Este pasado mércores 19 de marzo presentouse en Librouro (Vigo) o libro “A marcha da paz secuestrada”, de Primitivo Carbajo. O acto foi presentado por Celso López, en representación da Asemblea Republicana de Vigo.
O xornalista e escritor zamorano fai crónica no seu libro (escrito con grande calidade literaria) dos países que a Marcha Pola Paz en centroamérica percorreu no ano 1985, países que estaban inmersos en terribles conflitos armados e guerras civís e onde, ó carón de todo, sobrevoaba a presencia de USA. Eses países foron Panamá, Costa Rica, Nicaragua, Honduras, El Salvador, Guatemala e México.
Carbajo achegou interesantes reflexións sobre os procesos de paz na rexión e as dificultades para conseguila, así como a radiografía histórica, política, económica e, mesmo étnica dos países polos que a Marcha discurrira.
